2019-StrampelMuse in de Bütt...
...auf der Kappensitzung in Wonsheim
Los gehts
Das Rad gegen die Bütt getauscht
Ein lustiger Rückblick unserer Touren...
Los gehts
Der A.... tut weht, die Trikots stinken...
...höchste Zeit ein Bier zu trinken
Los gehts

 

 

 

2019 haben wir unsere Räder mal gegen die Bütt getauscht...

...und haben einen Fassenachtsvortrag über unsere Touren gemacht. Viel Spaß!

 

Intro

Wenn mer so als Mann, quasi stolzes Flaggschiff der Evolution,
en Baam geplanzt, e Haus gebaut und gezeugt hat einen Sohn,
was fer neue Abenteuer locke dann noch mit iwwer 40 Jahrn?
Des ist doch ganz eenfach, dann musche mit uns Fahrrad fahrn!

Raus an die frisch Luft, viel Beweschunung an des Natures Busen,
Bier trinke und Kappes mache, so simmer mir StrampelMusen!
Unser Fraue sin am frohlocke, denn ab jetzt hun se endlich ehr Ruh,
wenn mir vum Radle hamkumme simmer ferdisch, und manschmo aach zu.

Alle Johr fahr mer e paar Dach fort um ungestört unserm Hobby zu fröhne,
was scheenes zu erlewe, und e bissje Spass ham ohne viel devor zu löhne.
Net rasiere, de ganze daach mo ungestraft laut rülpse un ach e mo furze,
Nom Radfahrn schee esse, e paar Bier dringe und ach e mol en Kurze.

Von solche, unsere Toure, do wolle mer Eich e bissje was vezähle,
awwer erscht wolle mer getreu unserm Motto mo die Gläser hewe

Un rufe: De Arsch dud weh, die Triggos stinke,
höchste Zeit e Bier zu trinke! Prost!

 

 

 

Etappe 1 - Der Bodensee

Im erschde Johr, mer warn radreisetechnisch noch ziemlich unerfahrn,
gings enunner an de Bodenssee, drummerum und serick, so war der Plan.
Des schwäbische Meer bei scheenem Wetter umradele, so hatte mer uns des gedacht,
Doch es kam e bissje anners, weil mer hatte unser Rechnung ohne de Petrus gemacht!

Geschitt hot´s, wie aus Kiwwel, mer warn batschnass un hattens zimlich lad,
Doch mer hatten Glick im Unglick, omens fande mer e Unnerkunft mit Bierautomat.
Den hädde mer am liebschde glei leergedrunke, was hatte mer fern Dorscht,
Un ob mir am nächsde Tach weiterfahrn, war uns in dem Moment zimlich worscht

. Am nächste Moint hatte mer en Digge Kopp un Muskelkater in alle Knoche,
nix wie raus aus an die frisch Luft, weil in de Stubb hots aach net mer so gut geroche.
Was mache mern jetzt, mer kenne doch jetzt noch net haam,
un weil die Sunn gescheint hot, simmer dann doch noch e Sticksche weiter gefahrn.

Was hammer alles gesieh un erlebt, unnerwegs am Wegesrand,
des Pfahldorf, de Zeppelin und schöne Biergärte im Schwabeland.
Rheinfall, Schlösser und noch viel mehr so schöne Sache,
un am End konnte mehr no iwwer 300 Kilometer, immer noch lache.

Von de nächsten Tour no Holland wolle mer jetzt glei noch verzähle,
awwer erscht wolle mer getreu unserm Motto mo die Gläser hewe

Un rufe: De Arsch dud weh, die Triggos stinke,
höchste Zeit e Bier zu trinke! Prost!

 

 

 

Etappe 2 - Ijsselmeertour

Unser zwoote Tour ging no Holland ums Ijsselmeer.
Da isses schee flach, dann fällts uns aach net so schwer.
Doch widder hot uns de Petrus en Strich dorsch die Rechnung gemacht.
Das mer do 300 km nur Gejewind hun, dess hätte mer aach net gedacht.

Gereend hots aach noch und des von alle Seide,
zusamme mit dem Wind konnte mer das gar net so leide,
Was e Quälerei, das kann ich Eich saache, Ihr Leid,
Mer kamen net voran und der Weg rundrum war noch weit.

Am erschde Omend war uns des ganze schun fast zu viel,
zum Glück hammer e Hotel gefunne, ganz im StrampelMuse Stil,
Löwe am Ingang, die Autos uffm Parkplatz warn ganz schee fett,
Geschlofe hummer dann in de Honeymoonsuite im Kingsizebett

Ach in Holland, do gabs so viel zu entdecke,
Windmühle, Grachte und Käseecke,
Unendliche Weiten mit Schaf und Rind,
und driwwer geweht hot immer der scheiß Wind.

So hammers am Wasser lang, nuff bis zur Nordsee auf en gude Schnitt gebrunge
ham an de WM, uffem Stadtfescht, die Kleine Kneipe uff Holländisch mit gesunge.
Hamm uns vun Leckerbäckjes, Kippeling und Heineken ernährt,
un wurden als Deutsche, bei de WM, zum Staatsfeind Nr. 1 erklärt.

Von de nächsten Tour ins Frankeländle wolle mer jetzt glei noch verzähle,
awwer erscht wolle mer getreu unserm Motto mo die Gläser hewe

Un rufe: De Arsch dud weh, die Triggos stinke,
höchste Zeit e Bier zu trinke! Prost

 

 

 

Etappe 3 - Der Radschmetterling

Radschmedderling, so haasd die Tour, die mir gefunn hunn im Netz,
am frühe Moin gings gemidlich los, die Räder im Audo, ganz ohne Hetz.
Ein Flüchel des Schmedderlings ist mit rund 80 Km ned so arisch lang,
drum war uns zum erreiche des Ziels iwwerhaupt ned bang.

Omens gings zum Dusche, do wurde em Wolfgang erschd bewuschd,
dass sei Dusch so winzisch war, dass er sich debei bigge muschd.
Denoo gings zum Esse in de, ihr werds ned glaabe,
in de Gasthof zum Ochse so hies der Laade.

De Wird hat gesad, ich bin de Karl, un mer hun heit geschlacht, do wern er satt.
Wenn ehr was esse wollt, gibt´s Metzelsupp unn dono e großi Schlachtplatt.
En scheene unn vor allem lange Omend hadde mer beim Karl,
des Esse war lecker un´s Bier un de Schnaps worde ach ned all.

Beim hamgeh hot er gefroot, ob mir am moje widder kumme.
Sehr gern hummer gesad, wemmer moje ach e Hax bekomme.
No dem Omend wär mer ohne Aspirin moins kaan Meder weider gefarn,
Es ging no Rothenburg, voll mit Tourisde, wer waas wo die her all warn.

Mer warn im Foldermuseum, un froh, dass die uns ned hunn dord behall.
Schnell sin mer widder los, weil omens hadde mir noch a Date mim Karl.
Als mir dann mied un schlachskaputt dort ankum sin, beim Karl in der Stube,
zappt der uns zwo große Bier un ruft no hinne: „Erna! Zwo Haxe fer die Bube!

Mir hun dord widder gud gess und ordendlich geölt unsre dorschdische Kehle,
denoh kam de Karl middem Schnaps und wollt uns noch en Trinkspruch verzähle.
Was wolld ihr hern, ihr Bube, en Ländliche odder en versaude
En ländliche hummer gesaat, weil mer uns ned so richdisch traude.

Der hot dann losgeleht: „Der Bauer steht am Scheierdoor und pinkelt durch die Ritze,
drinnen fällt die Sense um, und weg war seine Spritze.
Der Stummel blieb ihm noch zum Trost, ------- Prost.“

Bevor mir von de nächsten Tour vunn Metz bis haam jetzt glei noch verzähle.
wolle mer getreu unserm Motto awwer erscht mo die Gläser hewe

Un rufe: De Arsch dud weh, die Triggos stinke,
höchste Zeit e Bier zu trinke! Prost

 

 

 

Etappe 4 - Mosel & Rhein

Vun Metz die Mosel enuff bis Koblenz und de Rhein enunner bis deham,
wollte merr bei scheenem Wetter radele, klar, das des widder anners kam.
Mim Zuch gings no Metz und dort hummer in der Jugenherbersch geschloof,
am nächste Moin, gabs ka venünftig Frühstück das war dann schummo doof.

Als mer losgefahrn sin, hots dann ach noch zu reene angefange,
un am Atomkraftwerk in Cattenom war uns dann ach ganz schee bange.
Zum Glick hummer omens e scheh Unerkunft im Woigut enddeckt,
un wesche unserm Hunger in de nächst Kneip mo die Speisekart gecheckt.

Die Köchin war krank ´s gab nur Gulaschsupp, Flammkuche, Schinkeplatt,
des hummer genau in der Reihenfolsch gestellt, dann war mer aach satt!
Dezu hammer des ane oder annere Biersche mit Genuß noch getrunke,
un dann em Wirt, mit e paar weitere Flasche unnerm Arm, zum Abschied gewunke.

Am nächste Morsche gabs beim Frühstück dann ein klitzekleines Versehe,
wie der deire Riesling in die Trauwesaftflasch kam, konnt die Wirtin gar net verstehe.
Uns hots gefreut und mer hammen dann mit Genuß komplett leer gemacht,
dann simmer schnell los, awwer mer ham noch e paar mol do driweer gelacht.

Uff derer Tour war de Reesche widder mo unser treuester Begleiter,
so simmer die Mosel nuff bis Koblenz und dann am Rhein widder weiter,
Ham in Koblenz uff de Ehrenbreitstein Publik Viewing mitgemacht,
un hams dann bis ham, trotz em Pladde, uff ball 400 Kilometer gebracht

Bevor mir von de nächsten Tour dorch vier Bundesländer verzähle.
wolle mer getreu unserm Motto awwer erscht mo die Gläser hewe

Un rufe: De Arsch dud weh, die Triggos stinke,
höchste Zeit e Bier zu trinke! Prost

 

 

 

Etappe 5 - Vierländertour

Mo ganz ohne Audo und Zuch, vun daham aus e schee Tour zu mache,
ganz lang und emol so richtisch weit, also nix fer Eich Schwache,
des hammer uns mit Elan, dann des Johr druff vorgenomme,
awwer ihr kennts Eich schon denke, es is dann doch annerschd gekomme.

Am erschde Daach simmer frieh moins, noch faschd im dungele gestartet,
sin iwwer de Rhoi, vun Rhoihesse durch Hesse bis in de Odewald geradelt.
Schnell hatte mer e Unnerkunft gefunne, jetzt noch e Kneip, das wär jo gelacht,
fer unseren Hunger un Dorschd hat grad an de Eck en Griesche nei uffgemacht.

Das Esse war reichlich un des Bier war sche kalt, do hatte mer kei Not,
de Ouso gabs uffs Haus un die Familieplatt war ein Eröffnungsangebot.
Zurück in de Pension rief de Jochen: „Ich glaub ich bin im Paradiese hier!“
Dann hunn ischs ach gesieh --- im Fluhr stand en Kiehlschrank, voll mit Flaschebier!

Die nägschde paar Taach, wollte mer genau so weiter verfahre,
gud esse, gut tringe un zwischedorsch e bissje Fahrrad fahre
Am Main entlang no Mildebersch, dorsch de Wald hammer uns die Bersch enuff gequält,
als wärs net schun ostrengend genuch, do hot de Petrus aach noch e C-Rohr ogestellt.

So ging dess bis ball dehaam, die nägschde Dach weider mit dem Reesche,
am Hockenem Ring war mer so batschnass, mer konnte uns kaum noch bewesche.
Zum Glick hummer in Speyer, in de Juchendherbersch no e drocke Plätzje vewischt,
dort hammer uns dann vun inne nass gemacht, er kennt mer glawe, des hot gezischt!

Bevor mir von de nächsten Tour an die Wasserkupp verzähle.
wolle mer getreu unserm Motto awwer erscht mo die Gläser hewe

Un rufe: De Arsch dud weh, die Triggos stinke,
höchste Zeit e Bier zu trinke! Prost

 

 

 

Etappe 6 - Die Wasserkuppe

Die Wasserkuppe-Tour, die mir desmols vor uns hadde, war ned so leicht zu wubbe,
wie immer hatte mer jede Menge Wasser von obbe, und noch viel mehr Kubbe.
Los gings am omend von Meenz mim Zuch, ei wäre mer nur mim Audo gefahrn,
mer hatte glei e Stundd Verschbädung, thank you for traveling with Deutsche Bahn!

Spät omens in Nürnberg okumme, hammer schnell noch e Bier genumme un sin dann ins Bett,
un am nägschde Daach gings flott los, mer hatte immer gut Fett uff de Kett.
Sauheiß wars an dem Daach, un mir warn middachs schon völlisch unnerhopft,
drum hammer, fer e kald Biersche, mo an de nägschde Kneipedier angeklopft.

Die Paus unn des Bier hunn de Wolfgang ganz schee geschlaucht,
deer hat soo die Scheißerei, der hot alle unser Tembos uffgebraucht.
Alle paar Kilomeder schrie de Wolfgang vun hinne laut „hald“,
dann isser schnell runner vum Rad und nix wie ab in de Wald.

Am nägschde Daach gings erschd gut voran, mer machden aach ned schlapp,
Berschrunner unn hoch, do ruft de Jochen vunn hinne: „Mei Reife iss platt.“
No de Reberadur simmer Richdung Fulda an de ehemalisch Grenz entlang,
awwer vorm steile hochfahrn uff die Wasserkubb war uns doch e bisje Bang.

Geschitt hots wie aus Kübel und windisch wars bis auf des Berges Spitze,
mer ware badschnass un des ned nur vumm Schwitze.
Bevor mir von de nächsten Tour an die Lahn glei noch verzähle,
wolle mer getreu unserm Motto awwer erscht mo die Gläser hewe

Un rufe: De Arsch dud weh, die Triggos stinke,
höchste Zeit e Bier zu trinke! Prost

 

 

 

Etappe 7 - Lahntalradweg

In dem Johr, do wollde mer mo was ganz neies ausprobiere,
un emol des Radfahrn, mit ner Kanufahrt uff de Lahn kombiniere.
Vun Wiesbade aus mim Zuch no Bad Laaspe, do ging unser Tour los,
dort okumme gabs im Brauhaus Bosch die kla Bierprob, awwer in groß

Moins gings zum Lahnkopf berschnuff, also an die Quelle vun de Lahn,
mittags simmer dann dorch de Wald bis enunner no Marbursch gefahrn.
Dort okumm, gabs in de Jugendherbersch Stress, den Jochen los ich so was net mee buche,
Statt em scheene Doppelzimmer, musste mer uns e frei Plätzje imme 8 Bettzimmer suche.

Alle Steckdose warn mit Ladegeräde voll, des Zimmer sah aus wie Sau,
awwer Naachst hammer uns gerächt an dene, des waas ich noch ganz genau.
Kaa Auch ham die in der Nacht zukrieht, weil serick kame mer ziemlich späd,
un no der Menge an Weizebier, hummer dene en ganze Wald abgeseed.

Frie moins simmer dann schnell, bevor die wach worn sin, fort gefahrn,
sin no Weilbursch geradelt und warn am nächsde Moin mim Kanu uff de Lahn.
Des wackeld wie en Entearsch un zu dem ist des aach noch obbe offe,
dann hots ogefang se reene, es Kanu war voll, beinah wär mer abgesoffe.

Wirrer druff uffs Rad und weiter hots ach dann geschitt, wie aus Kiwwel,
Mer ham dann irgendwann abgebroch, ich hoff er nemmts uns net iwwel.
Bevor mir von de nächsten Tour an de Schluchsee verzähle,
wolle mer getreu unserm Motto awwer erscht mo die Gläser hewe

Un rufe: De Arsch dud weh, die Triggos stinke,
höchste Zeit e Bier zu trinke! Prost

 

 

 

Etappe 8 - Schluchseetour

Weil mer Irschendwann gemerkt hun, dass der Berni aach Rad fährt, hummer gesaat, fahr doch mo mit.
un dann war das Freitachs Omends so schee mit dem, do hummer beschloss, ab jetzt fahr mer zu dritt.
Mer hun dann sesamme e Tour geplant, von dehaam dorsch de Schwarzwald bis zum Schluchsee,
dorsch die Palz unn Frankreich, iwwer Badden-Baden und Freibursch, das werd bestimmt schee.

Die erschd Etapp hatts schunn in sich, ´s ging steil enuff, awwer dann aach wirrer enunner,
die Hoss vom Berni war so dinn, dass de gesieh hosch: „Der hot jo gar nix drunner!“
Des wär en alde Radfahrertrick hot uns de Berni dann erklärt. Fährst Du ohne Unterhose,
dann kannsche Meileweit fahre und kriegsch trotzdem am Arsch kah Bloose.

Aach en Strampelmuse Azubi muss genau so gud ausgestatt sei, wie die Ur-Strampler, also ihr,
desweje hunn se mer e Strampelmuse-Kapp iwwereicht, glei schunn vorm erschte Bier.
In Freibursch simmer dorsch de Kambuss gefahr, amol net uffgebasst, ich Doller,
do isses dann bassiert, Peng, schunn hing de ich mim Rad am Poller.

Was den Berni net umbringt, des macht den nur noch härter, desweh simmer aach weider geeiert,
No Kirchzarten zum Ultra-Bike-Marathon, dord wurd de Wolfgang schunn beim okumme rischdisch gefeiert,
E jungi Frau issem direkt um de Hals gefalle, hotten geküsst un kräfdisch dedrickt,
hot dann gerufe“ Glückwunsch dem Sieger!“ Ich hun gedenkt, jetzt wer ich verickt.

Omends hum mer uff de Couch gehockt, nur di Unnerhose oo un warn ganz schee schlapp,
do rieft Berni „Scheiße ich bin jo naggisch“ rennt fort und holt schnell sei Strambelmuse-Kapp,
zieht die glei uff, rennt serik, hockd sich wirrer hie unn erschd dann isser wirrer gud mit de Welt.
Ich glaab das kam ach e bisje vun dem Poller, weil net nor sei Bah war mittlerweile grie un gelb.

Die erschde Tour mim Berni war e eschdes Erlebnis, trotz widder viel Ree unn nur e bissje Sunn,
drum hummer dann beschloss, das mer den ab jetzt immer mit nemme, des hot er jetzt devunn.
Von de nächste Tour an Jagst und Kocher wolle mer jetzt glei noch verzähle
Awwer erscht wolle mer getreu unserm Motto mo die Gläser hewe

Un rufe: De Arsch dud weh, die Triggos stinke,
höchste Zeit e Bier zu trinke! Prost

 

 

 

Etappe 9 - Kocher-Jagst-Radweg

Keine Gnade für die Wade, so hies unser Moddo fer die Tour an Jagst un Kocher,
do is so e bisje de Berni dro schuld, der treibt uns immer so und lässt aach net locker.
Unser Berni, der is so schnell unnerwegs, dass mer den meischd nur noch am Horizont sieht,
mer zwo Dolle hetze dann wie die Bekloppte hinnerher, un denke, der fährt net, der flieht.

So simmer schun an mancher Abzweigung weiter gefahrn, obwohl mer hätte abbische misse,
mir warn dann widder mo zu langsam, awwer de Berni, weit vorne mit de Kard hät´s solle besser wisse.
Trotzdem hammer dann de Wech zum Glick doch noch gefunne und ham e schee Radtour gemacht,
ehr kennt mer glawe, mer hatte unsern Spass, ham viel gesieh un ham ach viel gelacht.

Mittlerweile folsche uns jo ach schun viele Leid bei Facebook, also in de Community,
do muss mer uffbasse, wenn mer iwwerall so bekannt is, sunschd is de gude Ruf glei hi.
Wenn mir so bei unser Toure im Facebook berichte, hummer gewissermaße ach en Bildungsufftrag,
deshalwer hummer, uff de Tour ach en bekannte Ritter besucht, den werglisch jeder gern mag.

Ein jeder kennt den, ein jeder kann sei weltberühmt Zitat auswennisch zum Beste bringe,
desweesche hot die Strampelmuse ka Mieh gescheut un war beim Götz fun Berlechinge!
Es gab jede Menge Likes, nachdem mer unsern kuldurelle Pfilchtteil gepostet hunn,
Seit dem simmer jetzt meh am Schreiwe, als am Biertrinke, des hummer jetzt defunn.

Unnerwegs hammer ach schun gedenkt, mer sin schun glei deham, die Tour is rum,
uff amo stand do e Wöllschder Ortsschild, wieso, do simmer später erst druff kum.
De Berni war wirrer mo als erster dorsch und hot gesahd, do kann was net stimme,
do fehlt die Zieschelei, de Wasserturm un de Gerd Rocker, samt seine Woiköniginne.

So hot sich des dann ach noch uffgeklärt und mer hadde in Abtsgemünd noch viel zu lache,
Deswe hammer beschlosse des Johr druff, no 10 Johr, ach noch e Jubiläumstour zu mache.
Bevor mir von unserer ledschd Tour quer dorsch Bayern verzähle,
wolle mer getreu unserm Motto awwer erscht mo die Gläser hewe

Un rufe: De Arsch dud weh, die Triggos stinke,
höchste Zeit e Bier zu trinke! Prost

 

 

 

Etappe 10 - Vom Königssee zum Bodensee

Zehn lange Johr gibt’s uns schun, geradelt simmer schun so manchen Kilomeder,
warum mer des schun so lang mache, was no unserm Vortrach jetzt werklich jeder.
Des vorsche Johr hummer e ganz Woch in Bayern so manchen Gipfel erklomme,
un in deer Woch, is in Bayern, de Bierkonsum, uff en neue Höchswert gekomme.

Mer hun omens, nom Radfahre, in de Kneip erschd e mol drei Helle bestellt,
un dann beim Esse mindeschdens nochemo drei, bei so was peife mer uffs Geld.
Mer sin mit Muse, quer dorch Bayern, so einige Kilomeder mim Rad gefahrn,
un omens hummer immer ogestoß, awwer uff jedes, vun unsere 10 Jubeljahrn.

Mer warn am Watzmann, in Füssen und aach im Allgäu wars schee,
sin e ganzi Woch quer dorch de Freistaat, bis an de Bodensee.
Ham im Hotel , auf der Suche no e bissje Wlan, fascht alles getan,
ham, weje dem Wlan, sogar faschd naggisch, mim Handy in de Eck gestann.

Des warn unsre Toure, mir kennde noch weider ferzähle bis heit Nacht,
alles devunn is werklich so bassiert, un fun uns nur in Reimform gebracht.
Ihr seht, mir sinn Radler, die sportlich unnerwegs sin, mid weidere Ziele,
zähle kammer unser Kilomeder eh ned meh, es sinn schon zu viele.

Mer hun uff unsere Toure viel erlebt un noch meh gesieh,
awwer jetzt simmer wirrer in Wonsem, weil do gehere mer hi,
Mer warn in Bayern, im Ausland, an de Mosel un am Roi,
awwer nirgendswo gibt was Besseres wie unsern Wonsemer Woi.

mer sin jetzt ferdisch und wolle aach nix me verzähle,
Awwer mer wolle e letschdes mo die Gläser hewe

Un rufe: De Arsch dud weh, die Triggos stinke,
höchste Zeit e Schoppe zu trinke! HELAU!

 

 

 

Zugabe

Wenn mir dess Johr zu unsrer nägschd Tour vun Berlin no Fulda uffbresche,
kennd ehr uns bei Facebook folsche, des wird lustisch, des due mer Eich heit schunn vespresche.
un wenn mer serick kumme, wär a Willkommensbanner am Ortsingang sehr scheeh,
un de Kinnerchor kennt singe, zusamme mit unsere Fans, de wär e toll Empfangskomitee!

Un wer jetzt immer noch glaabd, unser Vortrach wär frei erfunne un gar net wohr,
der kann gern mo mit uns fahrn, des is net schwer, mir mache eich das gern vor.
Alle annere Faule bleiwe daham uff de Couch un gugge am PC.
im World Wide Web simmer zu finne unner strampelmuse.de


Helau!

© 2019 Strampelmuse

DSGVO